1. Bu Konvensiya həm sənaye müəssisələrində çalışan qadınlara, həm də evdə işləyən qadınlar da daxil edilməkə, qeyri-sənaye və kənd təsərrüfatı işlərində çalışan qadınlara tətbiq olunur.

2. Bu Konvensiyanın məqsədləri üçün «sənaye müəssisələri» termininə dövlət və xüsusi müəssisələr, eləcə də onların şöbələri aid edilir və xüsusilə:

a) şaxtalar, karxanalar və çıxarma sənayesinin digər müəssisələri;

b) istehsal əşyalarının hazırlanması, düzəldilməsi, təmizlənməsi, təmir edilməsi, bəzədilməsi, naxışlanması, satışa hazırlanması, sındırılması və ya məhv edilməsi üzrə müəssisələri və ya gəmiqayırma müəssisələri və elektrik enerjisinin və ümumiyyətlə hərəkətverici qüvvələrin istehsalı, transformasiyası və ötürülməsi üzrə müəssisələr də daxil edilməklə, materialların emalı üzrə müəssisələri;

c) inşaat, bərpa, təmir, yenidən tikmə və dağıtma ilə məşğul olan tikinti müəssisələri;

d) yüklərin doklarda, körpülərdə, platformalarda, anbarlarda və ya aeroportlarda işlənməsi də daxil edilməklə, sərnişlərin və ya malların yollarla, dəmir yolları ilə, dəniz və ya çay yolları, yaxud hava ilə daşınması üzrə nəqliyyat müəssisələri daxil edilir.

3. Bu konvensiyanın məqsədləri üçün «qeyri-sənaye işləri» termininə aşağıdakı dövlət və ya xüsusi müəssisələrdə, yaxud xidmətlərdə və ya onların fəaliyyətləri ilə əlaqədar yerinə yetirilən bütün işlər;

a) ticarət müəssisələri;

b) poçt və elektrik rabitə xidməti;

c) heyəti əsasən dəftərxana işi ilə məşğul olan idarə və inzibati orqanlar;

d) qəzet müəssisələri;

e) mehmanxanalar, pansionlar, restoranlar, klublar, kafelər və başqa ictimai iaşə müəssisələri;

f) xəstələrə, alillərə, yoxsullara və yetimlərə müalicə və qulluq üzrə müəssisələrə;

g) teatrlar və mədəni kütləvi idarələr;

h) xüsusi təsərrüfatlarda yerinə yetirilən muzdlu ev əməyi; eləcə də səlahiyyətli hökumət orqanının bu Konvensiyanın müddəalarını tətbiq etmək qərarına gəldiyi bütün qeyri-sənaye işləri aid edilir.

4. Bu Konvensiyanın məqsədləri üçün «kənd təsərrüfatı işləri» termininə, tarlalar və sənayeləşdirilmiş iri kənd təsərrüfatı müəssisələri də daxil edilməklə, kənd təsərrüfatı müəssisələrində yerinə yetirilən bütün işlər aid edilir.

5. Bu Konvensiyanın müəyyən müəssisəyə, müəssisənin şöbəsinə və ya iş növünə tətbiqinin mümkünlüyünə şübhə olduğu bütün hallarda, bu məsələ səlahiyyətli hökumət orqanı tərəfindən, harada sahibkarların və əməkçilərin nümayəndəli müvafiq təşkilatları varsa, onlarla məsləhətləşdikdən sonra həll edilir.

6. Milli qanunvericilik bu Konvensiyanın tətbiqi dairəsindən, həmin ölkənin qanunvericiliyinin müəyyən etdiyinə görə, sahibkarın yalnız ailə üzvlərinin məşğul olduqları müssisələri çıxara bilər.

Bu Konvensiyanın məqsədləri üçün «qadın» termini, yaşından, milliyyətindən, irqindən və ya dinindən asılı olmayaraq, nikahda olan və ya olmayan, qadın cinsindən olan hər hansı şəxsi, «uşaq» termini isə, uşağın valideynlərinin nikahda olub-olmamasından asılı olmayaraq, hər hansı uşağı ifadə edir.

1. Bu Konvensiyanın tətbiq edildiyi qadın, onun güman edilən doğum vaxtını təsdiq edən tibbi şəhadətnamə təqdim etdikdə, hamiləliyə və doğuma görə məzuniyyət hüququna malikdir.

2. Hamiləlik və doğuma görə məzuniyyət müddəti ən azı 12 həftə təşkil edir və doğumdan sonrakı məcburi məzuniyyət müddətini də əhatə edir.

3. Doğumdan sonrakı məcburi məzuniyyətin müddəti hər bir ölkənin qanunvericiliyi ilə müəyyən olunur və heç bir halda 6 həftədən az ola bilməz; ölkənin qanunvericiliyi ilə nəzərdə tutulmuş qaydadan asılı olaraq hamiləlik və doğma görə bütün məzuniyyətin qalan hissəsi güman olunan doğum tarixindən əvvəl və ya doğumdan sonrakı məcburi məzuniyyət başa çatdıqdan sonra istifadə edilə bilər, yaxud onun bir hissəsi güman olunan doğum tarixinə qədər, qalan hissəsi doğumdan sonrakı məcburi məzuniyyət başa çatdıqdan sonra götürülə bilər.

4. Əgər doğum güman edilən tarixdən sonra baş verərsə, bu tarixədək götürülmüş məzuniyyət hər halda faktik doğum tarixinədək uzadılır, həm də doğumdan sonrakı məcburi məzuniyyət müddəti bunun nəticəsində qısaldılır.

5. Tibbi şəhadətnamə ilə müəyyən edildiyi kimi, hamiləlik səbəbindən xəstəlik halında milli qanunvericilik doğumadək məzuniyyətlə, maksimum müddəti səlahiyyətli hökumət orqanı tərəfindən müəyyən olunan əlavə müddəti nəzərdə tutur.

6. Tibbi şəhadətnamə ilə müəyyən olunduğu kimi, doğumla əlaqədar xəstələnmə halında qadın, maksimum müddəti səlahiyyətli hökumət orqanı tərəfindən müəyyən olunan, doğumdan sonrakı məzuniyyətin uzadılması hüququna malikdir.

1. 3-cü maddənin müddəaları ilə müəyyən edilmiş qaydada həmiləliyə və doğuma görə məzuniyyətdə olan qadın pul müavinəti və tibbi köməklik almaq hüququna malikdir.

2. Pul müavinətinin həcmi ölkənin qanunvericiliyi ilə elə müəyyən edilir ki, qadının özü və onun uşağı üçün gigiyena nöqteyi-nəzərincə yaxşı həyat şəraiti və lazımi həyat səviyyəsi təmin edilsin.

3. Tibbi köməklik ixtisaslı mama və ya həkimlər tərəfindən doğumdan əvvəl, doğum vaxtı və doğumdan sonra göstərilən xidməti və nəzarəti, eləcə də zəruri hallarda, qospitalda yerləşdirilməsini nəzərdə tutur; həm də mümkün qədər həm həkimin seçilməsində, həm də dövlət və xüsusi tibb müəssisəsinin seçilməsində tam sərbəstlik verilir.

4. Pul müavinətləri və tibbi köməklik ya məcburi sosial sığorta sisteminin vəasaiti hesabına, ya da dövlət fondları hesabına verilir; hər iki halda onlar, bir qayda olaraq, nəzərdə tutulmuş şərtlərə cavab verən bütün qadınlara verilir.

5. Göstərilən pul müavinətlərinə və tibbi köməkliyə iddia hüququ olmayan qadınlara ictimai yardım qaydasında köməklik göstərilməsi üçün, onların gəlirlərinin tələb olunan yoxlanması şərtilə, ictimai maddi yardım fondlarının vəsaiti hesabına müvafiq köməklik göstərilir.

6. Məcburi sosial sığorta vəsaiti hesabına verilən pul müavinətinin məbləği əvvəlki əmək haqqı əsasında hesablandıqda, o, qadının bu məqsəd üçün nəzərdə tutulan əvvəlki əmək haqqının üçdə iki hissəsindən az olmayan məbləği təşkil edir.

7. Hamiləliyə və doğuma görə müavinət verilməsini nəzərdə tutan məcburi sığorta sisteminə alınan hər cür haqq və ödənilən əmək haqqının ümumi məbləğinə əsaslanan və bu cür müavinətlərin verilməsi məqsədi ilə yığılan hər cür vergilər, cins fərqi qoyulmadan və onların sahibkarlar və əməkçilər və ya yalnız sahibkarlar tərəfindən verilməsindən asılı olmayaraq, həmin müəssisədə məşğul olan kişilərin və qadınların ümumi sayı əsasında ödənilir.

8. Heç bir halda sahibkar onda işləyən qadınlara verilən bu cür müavinətlərin ödənilməsi üzrə xərclərə şəxsi məsuliyyət daşımır.

1. Əgər ana uşağı əmizdirirsə, o bu məqsəd üçün ölkənin qanunvericiliyi ilə müəyyən olunan müddətə, gündə işi bir və ya bir neçə dəfə dayandıra bilər.

2. Uşağı yedirtmək üçün işdə fasilə iş saatı hesab olunur və bu qanunvericiliklə və ya ona müvafiq olaraq tənzimləndiyi hallarda ödənilir; bu məsələ kollektiv müqavilə ilə tənzimləndiyi hallarda, vəziyyət müvafiq müqavilə ilə müəyyən edilir.

3-cü maddənin müddəalarına uyğun olaraq qadın hamiləliyə və doğuma görə məzuniyyətdə olduqda, onun işdən azad edilməsi barədə sahibkarın verdiyi əmr, onun olmadığı və ya icra müddəti işdə olmadığı vaxta təsadüf edərsə, qeyri-qanunidir.

1. Beynəlxalq Əmək Təşkilatının bu Konvensiyanı ratifikasiya edən hər bir Üzvü, ratifikasiya barədə sənədlərə əlavə olunan bəyanatın köməkliyi ilə bu Konvensiyanın tətbiqindən:

a) qeyri-sənaye işlərinin bəzi kateqoriyalarının;

b) kənd təsərrüfatı müəssisələrində yerinə yetirilən (tarlalardan başqa) işlərin;

c) xüsusi təsərrüfatlarda yerinə yetirilən muzdlu ev əməyinin;

d) evdə işləyən qadınların;

e) dənizdə sərnişinlərin və ya yüklərin daşınması üzrə nəqliyyat müəssisələrinin çıxarılmasını nəzərdə tuta bilər.

2. Bu maddənin 1-ci bəndinin müddəalarının istifadə edildiyi iş və ya müəssisə kateqoriyaları təsdiq edilmə sənədləri ilə birlikdə yola salınmış bəyanatda göstərilir.

3. Təşkilatın bu cür bəyanat qəbul edən hər bir Üzvü onu istənilən vaxt yeni bəyanatla tam və ya qismən ləğv edə bilər.

4. Təşkilatın, bu maddənin 1-ci bəndinə müvafiq olaraq verdiyi bəyanatın qüvvəyə minməsinin aid edildiyi hər bir Üzvü bu Konvensiyanın tətbiqi haqqında özünün illik məruzəsində özünün qanunvericiliyinin və bu maddənin 1-ci bəndinin qəbul edilmiş bəyanata görə aid olduğu işlər və müəssisələr barədə əməli vəziyyəti və Konvensiyanın həmin işlərdə və müəssisələrdə hansı dərəcədə həyata keçirilməsi və ya həyata keçirilməməsinin nəzərdə tutulması haqqında məlumat verir.

5. Beynəlxalq Əmək Bürosunun İnzibati Şurası bu Konvensiyanın qüvvəyə mindiyi ilk andan beşillik müddət başa çatdıqdan sonra Konfransa bu istisnaların tətbiqi haqqında, onun fikrincə, bu barədə görülməli tədbirləri əhatə edən təkliflərdən ibarət xüsusi məruzə təqdim edir.

Bu Konvensiyanın ratifikasiyası haqqında rəsmi sənədlər qeydə alınmaq üçün Beynəlxalq Əmək Bürosunun Baş Direktoruna göndərilir.

1. Bu Konvensiya, Təşkilatın yalnız ratifikasiya haqqında sənədləri Baş Direktor tərəfindən qeydə alınmış Üzvlərini əlaqələndirir.

2. O, Təşkilatın iki Üzvünün ratifikasiya haqqında sənədləri Baş Direktor tərəfindən qeydə alındıqdan on iki ay sonra qüvvəyə minir.

3. Sonralar, bu Konvensiya Təşkilatın hər bir Üzvü üçün onun ratifikasiya haqqında sənədləri qeydə alındığı tarixdən on iki ay sonra qüvvəyə minir.

1. Beynəlxalq Əmək Təşkilatı Nizamnaməsinin 35-ci maddəsinin 2-ci bəndinə uyğun olaraq Beynəlxalq Əmək Bürosunun Baş Direktoruna göndərilən bəyanatda:

a) Təşkilatın həmin Üzvünün Konvensiyanın müddəalarını dəyişiklik etmədən tətbiq etməyi öhdəyə götürdüyü ərazilərə;

b) onun Konvensiyanın müddəalarına dəyişikliklər etməklə tətbiq etməyi öhdəyə götürdüyü ərazilərə və bu dəyişikliklərin təfsilatına;

c) Konvensiyanın tətbiq edilməyəcəyi ərazilərə və bu halda onun tətbiq edilməməsinin səbəblərinə;

d) onun, müddəaların gələcəkdə baxılmasınadək öz qərarını ehtiyatda saxladığı ərazilərə aid göstərişlər olmalıdır.

2. Bu maddənin 1-ci bəndinin (a) və (b) yarımbəndlərində göstərilən öhdəliklər ratifikasiyanın ayrılmaz hissəsi hesab edilir və onunla eyni nəticələrə səbəb olur.

3. Təşkilatın hər hansı bir Üzvü yeni bəyanat vasitəsilə bu maddənin 1-ci bəndinin (b), (c) və (d) yarımbəndlərinə görə özünün əvvəlki bəyanatındakı qeyd-şərtlərin hamısından və ya bir hissəsindən imtina edə bilər.

4. Təşkilatın hər hansı bir Üzvü 12-ci maddənin müddəalarına uyğun olaraq, bu Konvensiyanın ləğv edilə biləcəyi dövr ərzində, Baş Direktor əvvəlki hər hansı bəyanatın hər hansı şərtini dəyişdirən və müəyyən ərazilərdəki mövcud vəziyyət haqqında məlumat verən yeni bəyanat göndərə bilər.

1. Beynəlxalq Əmək Təşkilatı Nizamnaməsinin 35-ci maddəsinin 4-cü və 5-ci bəndlərində müvafiq olaraq, Beynəlxalq Əmək Bürosunun Baş Direktoruna göndərilən bəyanatda Konvensiyanın müddəalarının həmin ərazidə dəyişiklik etmədən və ya dəyişiklik etməklə tətbiq ediləcəyi göstərilir; əgər bəyanatda Konvensiyanın müddəalarının dəyişiklik edilməklə tətbiq ediləcəyi göstərilirsə, bu dəyişikliklərin nədən ibarət olması orada dəqiqləşdirilir.

2. Təşkilatın müvafiq Üzvü və ya Üzvləri, yaxud beynəlxalq hakimiyyət orqanı yeni bəyanat vasitəsilə, əvvəlki hər hansı bəyanatında qeyd-şərt kimi göstərilmiş dəyişikliklərdən istifadə hüququndan tam, yaxud qismən imtina edə bilər.

3. Təşkilatın müvafiq Üzvü və ya Üzvləri, yaxud beynəlxalq hakimiyyət orqanı 12-ci maddənin müddəalarına müvafiq olaraq Konvensiyanın ləğv edilə biləcəyi dövrlərdə, Baş Direktora əvvəlki hər hansı bəyanatın hər hansı şərtini dəyişdirən və bu Konvensiyanın tətbiqinə aid mövcud vəziyyət haqqında məlumat verən yeni bəyanat göndərə bilər.

1. Təşkilatın bu Konvensiyanı ratifikasiya etmiş hər hansı bir Üzvü, onun qüvvəyə mindiyi ilk andan onillik müddət keçdikdən sonra onu Beynəlxalq Əmək Bürosunun Baş Direktoruna göndərilmiş və onun tərəfindən qeydə alınmış ləğvetmə aktı vasitəsilə ləğv edə bilər. Ləğv etmə, ləğvetmə aktı qeydə alındıqdan bir il sonra qüvvəyə minir.

2. Təşkilatın bu Konvensiyanı ratifikasiya etmiş hər hansı bir Üzvü, əvvəlki bənddə qeyd edilmiş onillik müddət keçdikdən sonrakı bir il ərzində, bu maddədə nəzərdə tutulmuş ləğvetmə hüququndan istifadə etmədikdə növbəti onillik müddətə onunla bağlı olur və sonralar bu Konvensiyanı hər onillik müddət keçdikdən sonra, bu maddədə təsbit olunmuş qaydada ləğv edə bilər.

1. Beynəlxalq Əmək Bürosunun Baş Direktoru Beynəlxalq Əmək Təşkilatının bütün Üzvlərini, Təşkilatın Üzvlərindən aldığı ratifikasiya haqqında bütün sənədlərin, bəyanatların və ləğvetmə aktlarının qeydə alınması barədə xəbərdar edir.

2. Baş Direktor, ratifikasiya haqqında aldığı ikinci sənədin qeydə alınmasının Təşkilatın Üzvlərinə xəbər verərək, onların diqqətini bu Konvensiyanın qüvvəyə mindiyi tarixə cəlb edir.

Beynəlxalq Əmək Bürosunun Baş Direktoru, onun tərəfindən əvvəlki maddələrin müddəalarına müvafiq olaraq qeydə alınmış ratifikasiya haqqında bütün sənədlərə, bəyanatlara və ləğvetmə aktlarına aid müfəssəl məlumatları Birləşmiş Millətlər Təşkilatı Nizamnaməsinin 102-ci maddəsinə müvafiq olaraq, qeydə alınmaq üçün Birləşmiş Millətlər Təşkilatının Baş Katibinə göndərir.

Beynəlxalq Əmək Bürosunun İnzibati Şurası zəruri hesab etdiyi hər dəfə, o Baş Konfransa bu Konvensiyanın tətbiqi haqqında məruzə təqdim edir və bu Konvensiyaya tam və ya qismən yenidən baxılması barədə məsələnin Konfransın gündəliyinə daxil edilməsinin lazım olub-olmamasını həll edir.

1. Əgər Konfrans bu Konvensiyanı tam, yaxud qismən dəyişdirən yeni Konvensiya qəbul edərsə və yeni konvensiyada əkslik nəzərdə tutulmayıbsa, onda:

a) yeni, dəyişdirilmiş konvensiyanın Təşkilatın hər hansı bir Üzvü tərəfindən ratifikasiya edilməsi, 12-ci maddənin müddəalarından asılı olmayaraq, yeni, dəyişdirilmiş konvensiyanın qüvvəyə minməsi şərtilə, bu Konvensiyanın təxirə salınmadan avtomatik ləğv edilməsinə səbəb olur;

b) yeni, dəyişdirilmiş konvensiyanın qüvvəyə mindiyi tarixdən başlayaraq bu Konvensiya Təşkilatın Üzvlərinin onu ratifikasiya etməsi üçün bağlıdır.

2. Bu Konvensiya, Təşkilatın onu ratifikasiya etmiş, lakin yerini, dəyişdirilmiş konvensiyanı ratifikasiya etməmiş Üzvləri üçün hər halda forma və məzmununa görə qüvvədə qalır.

Bu Konvensiyanın ingilis və fransız mətnləri eyni qüvvəyə malikdir.